Wananchi wa Iran wamesimama pamoja na uongozi wao kwa nguvu zao zote

Kwa mujibu wa ripoti ya Idara ya Kimataifa ya Shirika la Habari la Hawza,  Sayyid Adnan Al-Junaid, Mwenyekiti wa Baraza la Usufi wa Kiislamu nchini Yemen, akizungumza katika Mkutano wa Saba wa Kimataifa wa “Mwamko wa Umma wa Muhammad (s.a.w.w.)”, uliofanyika siku ya Jumatano, tarehe 6 Aban 1405 Hijria Shamsia, kwa juhudi za Jumuiya ya Kimataifa ya Qadimun, akirejelea juhudi za miongo kadhaa zilizofanywa na maadui kwa lengo la kuudhoofisha Umma wa Kiislamu, alisisitiza kwamba mwamko wa mataifa na kuwafuata viongozi wenye uelewa na hekima kutakuwa msingi wa kuufanikisha umoja wa Umma na kushindwa kwa mipango ya kutaka kutawala na kujitanua.

Alisema: “Katika miongo kadhaa iliyopita, maadui wa Umma wa Kiislamu, kwa kutumia mbinu mbalimbali, zikiwemo vita laini, wamejitahidi kuwatenganisha Waislamu na Mtume Mtukufu (s.a.w.w.) pamoja na Kitabu cha Mwenyezi Mungu, na kudhoofisha uhusiano wao na dini na tunu za Kiislamu. Hata hivyo, Mwenyezi Mungu ameuwekea Umma huu viongozi wakubwa, wenye uelewa na hekima, ambao wamekuwa na nafasi muhimu katika kuamsha mwamko wa mataifa na kuimarisha moyo wa Muqawama.”

Al-Junaid, akirejelea hotuba za Kiongozi Shahidi wa Mapinduzi ya Kiislamu, Ayatullah Sayyid Ali Khamenei, kuhusu nafasi ya matukio katika kuamsha mwamko wa Umma wa Kiislamu, alisema: “Yale yaliyotokea nchini Iran yanaonesha kutimia kwa utabiri huu; kwani wananchi wa Iran walisimama pamoja na uongozi wao kwa nguvu zao zote, na maadui ambao walikuwa wameweka matumaini yao kwa vibaraka wao waliowategemea, walikumbana na kushindwa.”

Mwenyekiti wa Baraza la Usufi wa Kiislamu nchini Yemen pia alirejelea nafasi ya viongozi wa Muqawama nchini Iraq, akieleza kuwa wamekuwa na mchango katika kuimarisha moyo wa kusimama imara na kuwahamasisha wananchi kujikusanya na kushiriki katika harakati.

Aidha, aliitaja nafasi ya Shahidi Sayyid Abdulmalik Al-Khafsh katika kudumisha hai moyo wa jihadi kupitia hotuba, maelekezo na nasaha zake. Akirejelea hali ya Yemen, alimtaja Shahidi Sayyid Hussein Badruddin Al-Houthi, mwanzilishi wa mradi wa Qur’ani, pamoja na Sayyid Abdulmalik Badruddin Al-Houthi, ambaye ni kiongozi wa sasa wa njia hii. Kwa mujibu wa maelezo yake, viongozi hawa wamekuwa na nafasi muhimu katika kuamsha mwamko na kuchochea harakati za wananchi wa Yemen.

Kwa kutegemea Aya tukufu isemayo:

﴿وَاعْتَصِمُوا بِحَبْلِ اللَّهِ جَمِيعًا وَلَا تَفَرَّقُوا﴾

Tafsiri: “Na shikamaneni kwa pamoja na Kamba ya Mwenyezi Mungu, wala msifarikiane.”

Alisisitiza kwamba Qur’ani Tukufu imewaita Waislamu kwenye umoja na kuwaonya dhidi ya mifarakano. Kwa mtazamo wake, viongozi wa Muqawama, kupitia juhudi zao za kuyaleta mataifa karibu na kuunganisha safu zao, wamehuisha matumaini katika nyoyo za Umma wa Kiislamu na kuzuia kutimia kwa baadhi ya malengo ya maadui ya kuyatawala na kuyamiliki rasilimali na utajiri wa nchi za Kiislamu.

Al-Junaid, akieleza kwamba maadui hawataki Umma wa Kiislamu uwe na umoja, nguvu na kujitegemea, aliongeza kusema:

“Wao wanajitahidi kuyafanya mataifa yabaki yakiwa yametawanyika na dhaifu, ili iwe rahisi zaidi kuyatawala maeneo yao, rasilimali zao na uwezo wao. Kwa hiyo, umoja na mshikamano wa mataifa ya Kiislamu ni jambo la msingi na la lazima katika kukabiliana na mipango hii.”

Akirejelea uwezo na vipawa vilivyopo miongoni mwa mataifa ya mhimili wa Muqawama, alitoa wito wa kupanua mshikamano baina ya Waislamu na kusema: “Waislamu wanapaswa kuwa kama alivyowafananisha Mtume Mtukufu (s.a.w.w.) katika mshikamano na kuhurumiana; yaani wawe kama mwili mmoja ambao kiungo kimoja kinapoumia na 

kuteseka, viungo vingine pia huathirika.”

Mwenyekiti wa Baraza la Usufi wa Kiislamu nchini Yemen pia alieleza kuwa mwamko wa mataifa na kuenea kwa harakati za wananchi ni ishara ya kuongezeka kwa matakwa ya uhuru katika jamii za Kiislamu. Alieleza matumaini yake kwamba mataifa yaliyo chini ya shinikizo la tawala tegemezi, siku moja, kwa mwamko na utashi wao wenyewe, yataweza kuzilazimisha serikali zao kushirikiana na mataifa ya mhimili wa Muqawama, na hivyo umoja wa Umma wa Kiislamu kufikiwa katika wigo mpana zaidi.

Katika sehemu ya mwisho ya hotuba yake, Al-Junaid, kwa lugha iliyojaa matumaini, alizungumzia kuchomoza kwa alfajiri ya ushindi na umuhimu wa Waislamu kuandamana na kushiriki katika njia hii. Alieleza matumaini yake kwamba mataifa ya Kiislamu yataweza, kwa kushinda vikwazo vilivyopo, kufanikisha kuuweka huru Msikiti Mtakatifu wa Makka (Al-Masjid Al-Haram) na Msikiti wa Mtume (Al-Masjid An-Nabawi) (s.a.w.w.) kutoka katika utawala wa madola tegemezi, na hatimaye kuukomboa Msikiti wa Al-Aqsa kutoka katika ukaliaji wa mabavu wa Wazayuni, ili usalama na amani vitawale katika maeneo yote ya ardhi za Kiislamu.